Lu dialettu sicilianu

di Giuseppe Vultaggio

La me terra, è granni storia,
tuttu ‘u munnu àvi rispettu,
quanti “gemmi”, quanta gloria,
la so lingua: lu dialettu!

Lu dialettu d’’a me terra,
vi lu giuru, è sapuritu,
iddu ammalia, a tutti afferra,
beddu, azzenti…anticchia arditu.

Lu dialettu sicilianu,
è ‘na vera rarità,
è lu “DO” di ‘na sopranu…
è ‘na partitura in “LA!”

Duci, amabili, ruffianu,
quannu ‘u senti ti ristòri,
ti cattigghia e a manu - a manu…
trasi dintra lu to cori.

Jò rispettu lu dialettu
d’ogni terra: è tradizioni!
Ma lu nostru è cchiù d’effettu,
nun su’ frasi, su’ “emozioni”.

Patri “Danti”, lu toscanu,
jò lu sacciu, ‘un mori mai
ma lu nostru, ‘u sicilianu,
ti lu giuru…è megghiu assai!