di Giuseppe Li Voti
Si li termini su’ diversi
è chiaru chi è puru lu significatu,
non c’è di chi farisi meravigghia
ed è giustu chi veni spiegatu.
‘A lingua è chidda
chi li nostri nanni e nannavi
ni nsignaru a parlari
e diminticari non s’avi.
Iddi non eru a nudda scola
e allura comu si la nsignaru?
a cuminciari di lu senu maternu
quannu lu primu latti addattaru.
Sintennu cantari la ninna nanna
sintennu cantari li canzuneddi
sintennu diri chistu non si fà
stati attenti caruseddi.
E comu si nsignaru
chi non si piscia fora d’u rinali
accussì puru si nsignaru
chi s’avi a parlari naturali.
Chi ogni cosa avi lu so nomi
e sulu di ddu modu va chiamata
e accussì jornu dopu jornu
ogni cosa cci vinni nsignata.
Lu parlari ‘n-manera difformi
di la lingua chi ni nsignaru cû tantu affettu,
è chiaru chi non è chiù lingua
pirchì accussì ‘diventa dialettu.
Nessun commento:
Posta un commento
Questo blog consente a chiunque di lasciare commenti. Si invitano però gli autori a lasciare commenti firmati.
Grazie